7 Feb 08 (年初一) 年初一去老爺、奶奶家拜年，今年第一年拜利是，要大出血，前一晚好似趕工噤狂入利是。 下午，去探婆婆，她精神幾好，之前ｄ咳都好番晒啦！感謝主！ 之後，突然被人急call要去康叔家食晚飯，他住畢架山，我同Alen找了好耐先去到，係條街到食咗好多西北風，但找到路之後先發現完來同九龍塘火車站好近咋！ 晚餐後，我見時間還早又人齊，便邀請老爺、奶奶一家到我們新居坐吓，原來小小的屋企，都可以坐到11個人，熱鬧得很，幸好之前有入貨，雪櫃有湯圓，煲了一大煲，一人一碗，剛剛好！ 8 Feb 08 (年初二) 年初二，同老爺、奶奶一家去飲早茶，睇咗魔法奇緣，Alen同佢細老話唔好睇，白雪公主變心，王子娶了另一個女仔，但我覺得幾得意，童話世界VS現實世界。 之後，返屋企整Cheese Cake，預備明天秘書5公主來拜年作茶點。  
食譜：cream cheese 250mg, whipping crea 200ml, 魚膠粉2茶匙, 水3湯匙, 砂糖70g, 消化餅140克, 溶化牛油60g 1. 消化餅弄碎，加入溶牛油拌勻，放入餅盆內壓實。 2. cream cheese用打蛋機打至滑，加入糖打勻，再加入whipping cream再拌勻。 3. 用碗盛載魚膠粉，用水調勻，放入微波爐輕微叮熱。 4. 將魚膠粉水倒入已攪好的cream cheese拌勻。 5. 倒入餅盆內，放入雪櫃雪至凝固。 9 Feb 08 (年初三) 秘書5公主來陳宅拜年，還送了厚禮DVD機給我，謝謝你們！傾吓計又到晚飯時間，去了樓下唯一有開市的火煱店打邊爐，食物好好味同好新鮮，真係一分錢一分貨，因為係續碟計，唔係任食。 這間火鍋店叫「新三得」，之前我同Alen都未來食過，2個人又食得少，都係一大班人食抵ｄ！ 美食當前，我又偷偷地食咗小小墨魚丸同半塊肥牛，唔怕死呀！  
9 Feb 08 (年初四) 返崇拜，叫咗阿爸返，今次應該係佢第四次返教會，同佢食午餐時，問他感覺點呀？慣唔慣？聽到他的回應好好，起碼他唔抗拒聽，還知道他身體不適有向神祈禱，感恩呀！希望神在他心裏繼續工作，可以更認識主！ 之後，分別去了Alen的三叔和四叔家拜年，三叔還送了兩大袋菜俾我們(份量足夠食1星期有多)，退休後，他在元朗有租田種菜，所以他家裏不用買菜，自給自足，犀利！ 晚上，阿沈和阿菲來拜年，去咗Alen啲契媽開的泰國餐館晚飯，豐富的一餐。 好耐未同阿菲見面，除了結婚個晚傾咗幾句，自從她做教書工作，忙得很，好難約，所以新年都幾好，所有人都可以放假，去探親戚朋友，聚舊！ | 
